Madaxweynaha Soomaaliya, C/llahi Yusuf, ayaa waraysi gaar ah oo uu siiyey VOA ku sheegay in xaaladdiisa caafimaad eeysan aheyn sida loo buunbuuninayo. Hadalkaas ayaa madaxweynaha ka soo yeeray maalin kadib markii loola cararay isbitaal ku yaalla Nairobi.

Madaxweyne Yusuf ayaa sheegay inuu isbitaalka u tagay inuu isa soo baaro, isla markaana uu u gudbi doono magaalada London ee dalka Ingiriiska, halkaas oo uu joogo dhakhtarkii beerka ka beddelay 10 sano kahor.

'Mucaaradka lama hadlayno'

Madaxweyne Yusuf ayaa sheegay in dowladdiisu eeysan la hadleyn kooxaha mucaaradka ah, "jeer eey hubka dhigaan," ayuu yiri Yusuf.

Hadalkiisa ayaa ku soo beegmaya iyadoo uu ra'iisul wasaare Nuur Cadde isna VOA u sheegay inuu muhimmada koobaad siinayo inuu la hadlo mucaaradka dowladda.